أنيو ^^"

اليوم داومت كأول يوم لي بثالث ثنوي
"الله يعطين خير هالعام ويكفين شره .. وياكم"

كان يوم عادي يعني مافيه مشاعر ابد أبد
خوياتي سلمت عليهم عادي كاني شايفتهم امس مافيه حماس وفاقدتهم ومدري وشو xd
وما كان فيه حصص ولا دروس
ولا فيه شعور أني آخر سنه
وعطون مواد الترم وصراحة حسيت السالفه كرف شوي :")

كل المواد يبي له مخ مروق
"كيمياء,فيزياء,رياضيات,بيئة,انجليزي"
يعني كنت مدلعه بالكثير مادتين علميه بالترم والحين كل الترم مواد علميه -,-

واستلمت ثلاث كتب
"فيزياء,كيمياء,رياضيات"
صراحه كتاب الرياضيات لونه خققققققققه *.*

ولو انه موب واضح بالتصوير .. اهم شئ الخلفيه تنورة المدرسة
اصلا الوان الكتب بالتدريج جايه كله ازرق @@!

والحين هذاي منسدحه بسريري ومشتهيه سبرايت والا سفن بارد *.* مع ثلج 3>3>3>3>
الله يرزقن واحد -_-"

أيه صح ونسيت
السبت الي فات اخواني رجعوا من أمريكا =$
بس فدوى وفواز خلصوا دراسه ورجعوا بقى هيثم هناك الله يوفقه
بيتنا صار فيه حركه
واحلى شعور
لما تكون بغرفتك بالليل طفشان واحد يفتح الباب يقولك تبي قهوه 3>3>3>3>3> شعور جميل
والا الصبح يجيبون فطور ونفطر سواء
من زمان عن الشعور هذا
الحمد لله على سلامتهم 3>

والحين بروح ادور لي شغله
يمكن ارتب غرفتي ويمكن استمر على سدحتي وافتح اليوتيوب ^^"

عاد الله اعلم

يلا الى اللقاء =*

الصيف ~ 2

أهلاً وسهلاً ..

خل نكمل رحلتنا الداخليه

ووصلنا للقصيم وعادي كان مثل دايم بس الفرق خالتي كانت مسافره وجلست لحالي ببيت جدتي
وتابعت لي كم مسلسل ومشيت حالي ورحت يومين نمت عند عماني
يعني وسعت صدري بكل الطرق الممكنه

بعدين رجعنا للرياض قبل رمضان بيوم
وبدا رمضان عادي مثل اي رمضان  بس الشئ الغريب اني صرت اروح اصلي التراويح كل يوم >.<
وان شاء الله دوم

ولما بدت العشر الاواخر مشى اليوم الاول عادي ورحت مع امي وابوي صلينا قيام
ورجعت نمت
بكر الظهر جت امي تقومن الظهر اصلي
قمت عادي بس مازلت جالسه على السرير الا جت اختي الكبيره تخمن وتصيح
انا تنحت كنت توي مفتحه عيوني بقوم اصلي
قلت وش فيه قالت لالا ولا شئ
قلت لا جد وش السالفه وش بس تصيحين؟
قالت اريج بنت خالتي ماتت اليوم
عاد هنا من جد كانت صدمه جلست اضحك واقوله لا تمزحين وتتفاولين على البنت اصلا هي صغيره
وقمت بصلي الا تجي امي واقوله يمه مرام وش جالسه تمطرس فوق راسي
قالت امي وراه وش قالت
قلت تقول اريج ماتت!!
قالت امي عظم الله اجرس يابنيتي
عاد هنا من جد كان شعور مدري وشلون خميت امي وقلبت صياح
سكت شوي وصليت
ورحت عند امي واختي
وما شاء الله على امي قامت تهدينا وتقرا قران عندنا
وكملنا اليوم شوي صياح شوي نسكت
بالمغرب الفطور كل واحد اكل تمره بس ما كان لنا نفس بشئ
وتسحرنا ومسكنا خط للقصيم بحكم ان العزاء ببيت جدتي
وكانت ايام العزاء اطول ايام بحياتي كانت كئيبه وتضيق الصدر وبس نصيح واشياء مدري وشلون
بس الحمد لله كملنا باقي رمضان بصلاه بالمسجد وصرنا ندعي له بالصلاه
لما خلص رمضان وجاء العيد وكملنا العيد عادي الحمد لله

والحين كل واحد رجع لحياته عادي
لكن مازلت موب مستوعبه واحس ان باي لحظه بتجي تزورنا بالبيت
وامس بناته جو بيتنا ولعبت معهم
والحمد لله استانسوا
حطيت لهم مناكير >,< ولعبت معهم بالمراجيح والزحليقه والوي وسولفت معهم
يعني وسعنا صدورنا وصدورهم

يارب لك الحمد

بعصر الجمعه يارب ارحم اريج واغفر له ووسع له قبره يارب
يارب صبر قلوب اهله ورجله وعياله يارب
الله يصلح عياله ويهديهم ويخلي لهم ابوهم

الله يعين على هالدنيا
وهذا حساب بالتويتر كصدقه لأريج أتمنى تسون له فولو وتنشرونه ^^

@sadgh31

دمتم بحب 3>

الصيف ~ 1

أنيو ^^

يوم رجعت المدرسه رجعت معه ><"

بحاول اكتب الاشياء الي سويته بالعطله مع انه مهنا انجازات ذاك الزود :/

الاغلب تسدح وتبطح ودي اعيده من جديد عشان احاول انجز قهر راحت بسرعه
وبالعاده يصير فيه حماس للمدرسه واروح اتقضى خرابيط واخيط مريول واشياء
لكن ومازلت منسدحه قدام الابتوب ولا خيطت شئ ولا شريت شئ والحياة حلوه -.-
واول اسبوع كملته مع الاجازه وببدا اداوم ان شاء الله السبت

خل ابدا باجازتي ~,~

اول الاجازه كنت اريح من المدرسه وكنت مخططه اسافر لامريكا عند اخواني بس مالله كتب
فكان اول الاجازه حوسه كل يوم اهلي يختارون مكان بيروحون له
وبالاخير قرروا امي وابوي تصير رحله داخليه
تبدا بالطائف بعدين مكه بعدين ينبع بعدين المدينه وختامها مسك بالقصيم لما بدايه رمضان نرجع للرياض

ضبطنا العفش كانو الي بيسافرون انا واخوي سيف وامي وابوي
مشينا الفجر اتوقع الخميس الي قبل رمضان بثلاث اسابيع ×_×"

اول محطه الطائف
كانت جميله والله بس طفشنا لان كله بر وكشتات واحنا موب ذاك الزود على الكشتات
وكانت وصخه :/ وصخه بقوه
بس استمتعنا

صور..

هذا المكان من بلكونه وكان فيه هواء بارررررررررد

واكثر شئ اعجبن عندهم هالشئ الي هي اسواق الخضار بوسط الشارع وطعم الفاكهه والخضار جميييييييل وبقوه
واشترينا منهم

توت-مانجا-برشومي-عنب-كعب الغزال-برتقال .. هذا الي اشوفه بالصوره والباقي نسيته =.=

والفندق الي سكنا فيه كان كله معاريس ^.^
وهذي بعض السيارات الي امدى اصوره **

والحين نبدا بالمجطه الثانيه مكه
كانت زحمه نوعا ما بس جميييييييييله
خالتي الي ساكنه بجده جت معنا هي وبنات خالتي وكان وناسه
انا وبنات خالتي ثنتين كان لنا غرفه لحال بالفندق وكنا ماخذين راحتنا بقوه متى ما بغينا نطلع طلعنا متى ما جعنا جبنا اكل نروح للسوق نصلي كل شئ لحالنا
بس كانت ثلاث ايام ومرت بسرعه تمنيت لو طولت شوي

توي اكتشف اني ماصورت شئ بمكه غير الحرم والابراج ~.~

وبعدين تركنا بنات خالتي ورحنا للمحطه الثالثه ينبع 3> 3> 3> 3>

على انو اول مره اروح لينبع بس وقعت بغرام هذيك المدينه *^_^*
وعلى انو ما معنا احد بس احنا الاربعه بس كانت جمممممممميله جميله لابعد حد

بحرهم رايق ونظيف جوهم كان خطير بذاك الوقت الناس كل واحد بحاله مالهم دخل باحد شوارعهم فاضيه
مدري خقه من جميع النواحي

هذي الشاليهات الي كنا به 0=)
نسيت اسمه -.-

باقي صور ينبع صراحة بالكام والكام مدري وينه ×.×

هذا الي ممتوفر بالجوال حاليا **

ونكمل  رحلتنا ونروح للمدينه المنوره

الصراحه كانت كئيبه شوي وجلسنا يومين بس

هذا كان عشانا اول ما وصلنا كنا مره مره تعبانين والصراحه كانت لذيذه*-*

سقف الحرم ^^ عاجبن مدري ليه ~,~

وبعدين رحنا للقصيم

واكمل الرحله وباقي العطلة بتدوينه ثانيه ان شاء الله

*جالسه اكتب واقاوم النوم عشان ابي اعدل نومي -,-
وترى الصور من الجوال @@

وإلى اللقاء ^^